Mar 3 | BEF | STEP | Mone kanagu hitimono nonugu ti'ehibe.

Mark 3

Yesu yahi yufu no'ehina bomofihi le'mo ye ko'ehina

Mt 12:9-14; Lk 6:6-11

1 Mone kanagu hitimono nonugu ti'ehibe. 2 To ana nonugu bo mone yahi yufu no'ehina bo nohigo, enali Felosi bomagi Yesu fuli yupapogu le'mo bati hilifi lite mapahi fite mine'ahana yabe. Enali ai ya hulenogo bugu ka emekilune lite mapahi fite mine'ahabe. 3 Ya nehago, Yesu yahi yufu no'ehina bomofihi lu emi'ehina: Ho tito maga obo, luto lu emito'a yalo enali kumu ma luto enoloka habe: 4 Fuli yupapogu nani hetofa suhi hilufi sibi suhi hilube? Bomo le'mo bati hilufi keye lilube? Hiya'a eto'ehina suhi ni'ibe. Lenali ka lu nimilo. Ya ligo enali kaga meluse mine'ahana yabe. 5 Ya nehite komopa'ani ule'ale hite nehago Yesu ipagu gabu gigo ipaluga logo bigo bulu'i enohoto bu goloto'a yalo ana bomofihi: Kayahi su tobo, luto lu emigo, ai yahi su tolago hetofa yaha'a legita lolo hu'ehina yabe. 6 Yesu ya hu etago Felosi bomagi ana'asi limite Helotihi naga'i hiti'i kaga lite boga li'ahabe: Lali ya'ma Yesuhi hiya'a huto ho fililune lite boga li'ahana yabe.

Sipi nagami hefupolugu babu bona'magi li gehesa hi'ahana

7 To Yesu pana'alobomagi hiti anagati he'mite bite Galili nagami beletoga bi fa hi'ahago, yege yege boana'magi Galili kegi'ati Yutia kegi'ati Yelusale hepatogati, Itumia kapoguti, Yotani nagami muya beletogati ete to Taiya kegi'ati, Saitoni kegi'ati, babu lite yege yege bona'magi Yesu hu'ehinana kehelilete aitoga e'ahabe. 9 Ya hite babu bona'magi e'ahago, Yesu: Nani lilika ilafiye? luto ekesa yigito'a pana'alobo kumu: Lagaso boti mone li bati hi netalo, luto lu epi'ehina. 10 Ai epesi'ehina bona'magihi babu lite enele'mo bati hu'ehigo, yalo epesi'ehina bona'magi yege yege'na aitoga aku'i li gehesa hite, aimo bako hilune lite'ani aitoga ikini ikini hite li gehesa hi'ahana yabe. 11 To foipa felemagi Yesuhi bu gelete'ani aitoga kana futite kete sipi nogo melete: Kai Hu'mamofihi pana'a nohane lite lilata hi'ahago, 12 Yesu: Ya kaya melise minalo, luto enekesa lito lu laga hu'ehina yabe.

Yesu aposolo'a 12 ya'amagihi enele'mo ho ti'ehina

Mt 10:1-4; Lk 6:12-16

13 To yalo'i Yesu kosagu tito minoto'a, bita hu'ehina bomagi kumu kehe igo aitoga bi'ahabe. 14 To aitoga ago ai 12 bomagi enele'mo ho ti'ehibe. Enali aposolo bona'i yabe luto enigi molo'ehina to enali ai hiti minalabe luto enele'mo ho ti'ehina yabe. 15 To ai enoho lifilenogo bite kaga lu epilabe luto to foipa felemagihi enehe'mi epalalabe luto enele'mo ho ti'ehina yabe. 16 Ana 12 bomagi enigi'ani ya'ma yabe. Simoni, ai gi'a mone Pita yabe lite gi nehana ni'ibe. 17 To Yemesi Yoni kogunale, etali Sepetihi pana'ale yabe. To etigi'atiti mone'a Boanege yabe lite gi he'ahana yabe. Enali kaguti kokililika nasanamofihi pana'amale'i yabe lite etigi mele'ahana yabe. 18 To Atulu yagi, Filipi yagi, Batolomu yagi, Tomasi yagi, Yemesi ai Alifiasihi pana'a ai yagi, Simoni ai Kena kapoguti bo ai yagi, 19 To Yutasi ai Kelioti kapoguti bo yabe. Ana bouba ai alihi Yesuhi gutunu ka fateha'amagihi lu epi'ehina bo yabe. Enaligo enele'mo ho ti'ehina yabe.

Yesu to foipa felemagihi kaba bo'ani yabe.

Mt 12:22-32; Lk 11:14-23; 12:10

20 To Yesu ya'ma aposolo bomagihi enele'mo ho tiloto'a yalo hepa'aga bufa hu'ehibe. To ya higo bona'i babu lite aitoga aku'i bite li gehesa hilago, Yesugi pana'alobomagi nose'na menese mine'ahanagihe. To ya hago Yesuhi bona'amagi ya'ma kehelilete: Sibi lalibe, lite bite aimo anagati le'mo nu kite bufa hilune'mu habe.

22 To Yelusale hepatogati mono ka negana bomagi limite Yesu kumu ma lite li'ahabe: Oho. Ai komopa'agu foipa feleuba, olopa felemo, gi'a Bielesebulu, ana feleuba komopa'agu tito nohibe. To ana amuya feleuba aimo le'mo amuya nomalago ai bona'i komopa'aniguti fele li nohe'mi epalabe. 23 Ya lago, Yesu enali kumu kehe igo ago kaga mone fono ka luto lu noepito ya'ma enoloka ho'ehina: 24 Satau ai hiya'a huto Satahi le'mo he'milibe? Ya huto meni'ibe. To moneko naga'i loko hilete ai henogo ai henogo nehite minalana, enali moneko naga'i minalafihe? O'e. 25 To moneko lalamete loko hilete ai henogo ai henogo nehite minalana, moneko lalamete minalafihe? O'e. 26 To ana suhi huto Satahi naga'i loko hilete ai le'mo he'minogo ai le'mo he'minogo nehite minalana, moneko'i minalafihe? O'e. Ana naga'i su halina ni'ibe.

27 To bo moneuba amuya bomofihi fe'nopo gumina lilube'mu nohuto yata'a hena hilibe? Ai yata'a ana amuya bomofihi naga'motu sa gi ule'ale huloto'a, alihi noha'agu tito fe'noha'a bauna hilibe.

28 To ya huto ni'igo, nani ka'ni lusiga luto lu lepilunagi keheli'ehilo. Bona'magihi foipana'ani silaga'na Hu'mau pa so epalalibe. To ana huto megeka nelana'ani fato fato'na pa so epalalibe. 29 Aku'i moneko'na pa meso epalalina'a ni'ibe. Ai'a Sikalafu'amofi kumu megeka linogomo pa meso epalalina'mu yabe. Ya'ma enugupisalo minoba minoba hilina'mu yabe. 30 Yesu ya luto mono ka negana bomagihi lu epi'ehina yabe. Henabe lutobe? Enali komopa'agu foipa feleuba tito nohigo ya'ma yege fise suhi nohibe lite lago ai ya luto ka epekito lipoti epi'ehina yabe.

Yesu to lalameha'a hiti yabe

Mt 12:46-50; Lk 8:19-21

31 To alihi ito'afu to gona'amagi ete nehetite fegutoga minete, bo mone'a ho lifigo tito Yesuhi kehe i'ehibe. 32 Ya higo, aitoga li gehesa hite minana bona'magi ma lite lu emi'ahana: Buga. Itokagi kogonakamagi ete nehetilete fegutoga minete kai kumu kehe neibe. 33 To ai: Ya'ma ito'nigi to nogona'ni kuyu kuyu nehabe, luto luto'a yalo aitoga neminana bona'magihi bu go beloloto ma lu epi'ehina: Bu galo. Ya'ma bona'mo ito'nigi nogona'ni nehabe. 35 Ya'ma Hu'mamofihi ka'a kehelite agoya hi emilata nehanamagi enali nogo'nigi netali'nigi ito'nigi nehana yabe, luto Yesu ya lu epi'ehina yabe.